विराटनगर ४ मंसिर । नेकपा एमालेको आसन्न ११ औं राष्ट्रिय महाधिवेशनका लागि मोरङबाट ४३ जना प्रतिनिधिले सहभागिता जनाउने भएका छन् ।
महाधिवेशनका लागि आयोजक बाहेक भूगोलबाट सो संख्यामा प्रतिनिधि छनौट गरिने भएको हो ।
राष्ट्रिय महाधिवेशनका लागि देशभर एकै दिन मंसिर १३ गते प्रतिनिधि छनौट गरिदैछ ।
संघीय ६ वटा निर्वाचन क्षेत्र रहेको मोरङबाट ४३ जना प्रतिनिधिहरुले सहभागिता जनाउने एमाले केन्द्रीय सदस्य तथा मोरङ इन्चार्ज जीवन घिमिरेले जानकारी दिनुभयो । उहाँका अनुशार खुल्ला प्रतिष्पर्धाबाट २० जना, महिला प्रतिनिधि १३ जना, यूवा प्रतिनिधि ७ जना र दलित प्रतिनिधि ३ जना चयन गरिने छ ।
मोरङ १ बाट ४ खुल्ला, २ महिला र १ यूवा, क्षेत्र नं. २ बाट ३ खुल्ला, २ महिला र १ यूवा, क्षेत्र नं. ३ बाट ४ खुल्ला, ३ महिला, २ यूवा, क्षेत्र नं. ४ बाट २ खुल्ला, २ महिला र १ यूवा, क्षेत्र नं. ५ बाट ४ खुल्ला, २ महिला र १ यूवा, क्षेत्र नं. ६ बाट ४ खुल्ला, २ महिला र १ यूवा प्रतिनिधि चयन हुने केन्द्रीय सदस्य घिमिरेले बताउनुभयो ।
महाधिवेशन प्रतिनिधिका लागि आकांक्षीहरुको संख्या अधिक भएकाले सवै क्षेत्रमा निर्वाचन हुने अवस्था देखिएको बताईएको छ ।
प्रतिनिधिसभा निर्वाचन क्षेत्र अन्तरगत १ हजार २ सय पार्टी सदस्यहरु बराबर ४० वर्षमुनीका एक र कम्तिमा एक जना महिला सहित ४ जना प्रतिनिधिहरुने व्यवस्था रहेको छ ।
एमालेको ११ औं राष्ट्रिय महाधिवेशन आगामी मंसिर २७–२९ सम्म काठमाण्डौंमा हुँदैछ ।
