विराटनगर १३ भदौ । कोशी प्रदेश सभाको आजको बैठकमा ‘ कोशी प्रदेश तथ्याङ्क सम्बन्धी व्यवस्थित गर्न बनेको विधेयक ’ सर्वसम्मतले पारित भएको छ ।
कोशी प्रदेश सरकारका आर्थिक मामिला तथा योजना मन्त्री रामबहादुर मगरले विधेयक पारित गरियोस् भनी गर्नु भएको प्रस्तावमा सभामुख अम्बरबहादुर विष्टले निर्णयार्थ प्रस्तुत गर्दा सर्वसम्मतले पारित भएको हो । यस अघि विधेयकको दफावार छलफलमा कोशी प्रदेश सभा सदस्य निरन राई, कमला दर्नाल र छविलाल चुँडालले बोल्नु भएको थियो ।
विधेयकमा संशोधन प्रस्ताव दर्ता गर्नु भएको सदस्य रमेशकुमार बस्नेतले प्रस्ताव फिर्ता लिनुभएको थियो । मन्त्री मगरले सरकारले बनाउने योजना, नीति, नियम एवं कानुनलाई कार्यान्वयन तहसम्म लैजान तथ्याङ्कको महत्वपूर्ण भूमिका रहेको बताउनुभयो । उहाँले प्रदेश सरकारले प्रत्येक पाँच वर्षमा बनाउने योजनामा तथ्याङ्कको भूमिकालाई इन्कार गर्न नसकिने भन्दै सही तथ्याङ्कले मात्र सरकारले वितरण गर्ने सेवा, सुविधा नागरिकतहसम्म पुग्ने विचार राख्नुभयो ।
विशेष समयमा नेपाल कम्युनिष्ट पार्टी(माओवादी केन्द्र) कोशी प्रदेश सभा संसदीय दलका तर्फबाट गणेशप्रसाद उप्रेतीले सरकारले दलित सशक्तिकरण ऐन ल्याउनु पर्ने भन्दै सरकारले ल्याएको आम सञ्चार विधेयकमा धेरै त्रुटी रहेकाले पुनः न्याय,प्रशासन तथा विधायन समितिमा छलफल गर्नु पर्ने धारणा राख्नुभयो । उहाँले चालु अधिवेशनमै संसदीय नियमावलीलाई छिनोफानो गर्न सुझाव दिँदै सरकारले ल्याउने ऐनमा जनता खुशी हुनु पर्ने धारणा राख्नुभयो ।
शून्य समयमा कोशी प्रदेश सभा सदस्य दुर्गाप्रसाद चापागाँई, सपना दर्जी, प्रदीपकुमार सुनुवार, सुनिताकुमारी गुरुङ, विद्या चाम्लिङ राई, कमला थापा मगर, मीना श्रेष्ठ, किशोरचन्द्र दु्लाल, तिलचन पाठक र शोभा चेम्जोङले विविध पक्षमा सरकारको ध्यानाकर्षण गराउनु भएको थियो । प्रदेश सभाको अर्को बैठक भदौ १५ गते दिउँसो १बजे बस्नेछ ।
