विराटनगर २४ असार । कोशी प्रदेश सभाको आजको वैठकमा ‘योगदान मुलुक निवृत्तिभरण कोष स्थापना तथा सञ्चालन सम्वन्धमा व्यवस्था गर्न बनेको विधेयक’ सदनमा पेस भएको छ ।
प्रदेशका आर्थिक मामिला तथा योजना मन्त्री रामबहादुर मगरले उक्त विधेयक सदनमा प्रस्तुत गर्नु भएपछि सभामुख अम्बरबहादुर विष्टले निर्णायार्थ प्रस्तुत गर्दा सर्वसम्मतले परित भएको छ ।
यस अघि सुन्य समयमा बोल्दै प्रदेश सभा सदस्य राजन कार्कीले पर्यटन, वन तथा वातावरण मन्त्री सदानन्द मण्डलले सचिवालयका कर्मचारी अमृत मेहताको क्यूआर कोड मार्फत आफ्ना मन्त्रालयका कर्मचारीहरुसँग रकम माग गर्ने गरेको व्यापक गुनासो र सामाजिक सञ्जालमा आएपछि सो विषयमा सरकारको आधिकारिक धारणाको माग गर्नुभयो ।
अर्का सदस्य सपना दर्जीले भारतबाट दैनिक १० टन माछा मोरङ, सुनसरी र झापाबाट अवैध रुपमा आयात हुने गरेकोमा नियन्त्रण गरी स्वदेशी माछा कृषकलाई घरवार विहिन हुनबाट जोगाउनु पर्ने धारणा राख्नु भयो । प्रदेश सभाको अर्को बैठक आगामी साउन ७ गते दिनको १ बजे बस्ने सभामुख विष्टले सदनसमक्ष जानकारी गराउनु भयो ।
