विराटनगर २० चैत । कोशी प्रदेश सरकारले सुरु गर्न लागेको ‘कोशी प्रदेश पयर्टन वर्ष २०८२’को नारा, लोगो र मस्कट सार्वजनिक गरेको छ । पर्यटन, वन तथा वातावरणमन्त्री सदानन्द मण्डलले पर्यटन वर्षको नारा, लोगो र मस्कट आज सार्वजनिक गर्नुभएको हो ।
पर्यटन वर्षको नारा ‘कोशीको गौरब, हिमालको शान, पर्यटन वर्षमा सबैको सम्मान’ नारा सार्वजनिक गरिएको छ । यस्तै, नमस्कार गरेको रेडपाण्डालाई मस्कट र नेपालको झण्डामा भएको निलो, सेता, रातोको घेराभित्र माथिल्लो भागमा हिमाल, त्यसको तल पहाडी क्षेत्र र त्यसको तल अर्नासँगै नदी बगेको तराई–मधेस क्षेत्र भएको लोगो सार्वजनिक गरिएको छ । मन्त्रालयले सार्वजनिक सूचना आह्वान गरी नारा, लोगो र मस्कट तयार गरेको हो ।
उत्कृष्ट भएको नारा, लोगो र मस्कट निर्माण गर्नेलाई ५० हजार पुरस्कारको मन्त्रालयले व्यवस्था गरेको छ । तर मन्त्रालयले नारा, लोगो र मस्कट सार्वजनिक गरे पनि तयार गर्नेको नाम सार्वजनिक गरेको छैन । उनको नाम पुरस्कृत गर्ने दिन मात्रै सार्वजनिक गर्ने मन्त्रालयको तयारी छ । मन्त्री मण्डलले यस प्रदेशमा रहेको अग्ला हिमालहरु अहिलेसम्म प्रदेश सरकारले बेच्न नसकेको र त्यो संघीय सरकारले नै बेच्दै आएको हुँदा कोशी प्रदेश पर्यटन वर्ष सफल पारेर त्यसको फाइदा प्रदेशवासीलाई उठाउन आह्वान गर्नुभएको हो । कोशी प्रदेश पर्यटन वर्ष २०८१ चैत २७ गते लालिगुराँसको राजधानी बसन्तपुरमा प्रधानमन्त्री केपी शर्मा ओलीले उद्घाटन गर्ने तयारी मन्त्रालयले गरेको छ ।
पर्यटन वर्ष सफल बनाउन प्रदेश सरकारले समिति तथा उपसमितिहरु समेत गठन गरेर काम अघि बढाएको छ । समितिका उपसंयोजक कृष्ण साहले पर्यटन वर्षलाई पर्यटन क्षेत्रका भौतिक पूर्वाधारको आधार वर्षको रुपमा अघि बढाएको बताउनुभयो ।
अर्का उपसंयोजक भविस श्रेष्ठले भएको पर्यटकीय क्षेत्रको बजारीकरण र ब्राण्डिङ् पर्यटन वर्षमा गर्दै थप नयाँ पर्यटकीय गन्तव्यको पहिचान गर्ने बताएका छन् । उहाँले यस प्रदेशमा ४ वटा पाँच तारे होटल सञ्चालनमा रहेको र थप ४ वटा सञ्चालनमा आउने तयारीमा रहेको र १ सय ४ वटा होमस्टे दर्ता भई सञ्चालनमा रहेको बताउनुभयो ।
