विराटनगर २७ जेठ । प्याब्सन विराटनगरको आयोजनामा भोलि देखि तेश्रो संस्करणको विराट कप फुटवल टुर्नामेन्ट हुने भएको छ । शहिद रंगशाला विराटनगरमा हुने प्रतियोगितामा विराटनगरका २३ विद्यालयले सहभागिता जनाउने भएका छन् ।
प्याब्सन विराटनगरले आज पत्रकार सम्मेलन गरि आयोजनाको सम्पूर्ण तयारी पुरा भएको जनाएको छ । जेठ २८ देखि असार ५ गते सम्म हुने प्रतियोगिताका विजेताले २५ हजार र उपविजेताले ११ हजार नगद सहित ट्रफी हातपार्ने प्याब्सन विराटनगरका अध्यक्ष मोहन बुढाथोकीले जानकारी दिनुभयो । उहाँले प्रतियोगितामा ९ विधामा पुरस्कृत गरिने बताउनुभयो । उहाँका अनुसार प्रतियोगितामा कक्षा १० र हालै एसईई दिएका विद्यार्थीले सहभागिता जनाउने छन् ।
विजेता, उपविजेता बाहेक प्लेयर अफ द म्याच, बेष्ट गोल किपर, हाई स्कोरर, बेष्ट कोच, बेष्ट डिफेन्डर, बेष्ट प्लेयर अफ द टुर्नामेन्ट, फिनिसिङ प्लेयर अफ द सिरिज, फेयर प्ले टिमलाई पुरस्कृत गरिने अध्यक्ष बुढाथोकीले जानकारी दिनुभयो । प्रतियोगिता आयोजनामा करिव ५ लाख खर्च हुने अनुमान गरिएको प्रतियोगिता संयोजक नन्दलाल मण्डलले बताउनुभयो । प्रतियोगिताको सहआयोजकमा प्रदेश खेलकुद विकास बोर्ड कोशी र विराटनगर महानगरपालिका रहेको छ ।
विद्यालय स्तरबाट फुटवल खेलको विकास गर्दै खेलाडीहरुलाई प्रोत्साहन गर्दै भविष्यमा राष्ट्रिय तथा अन्र्तराष्ट्रिय स्तरको फुटवल खेलाडी उत्पादन गर्ने लक्ष्य रहेको प्याब्सन विराटनगरका सचिव अशोक लामाले बताउनुभयो ।
