विराटनगर ७ कात्तिक । आगामी मंसिर १६ गते मोरङ ग्रामथान गाउँपालिकाको अध्यक्ष पदका लागि हुन लागेको उपनिर्वाचनमा एमालेमा ११ जना आकांक्षी देखिएका छन् ।
गत स्थानीय तह निर्वाचिनमा अध्यक्षमा पराजित पूर्व गाउँपालिका अध्यक्ष सहित ११ जना आकांक्षी देखिएका हुन ।
आज ग्रामथान २ झोराहाटमा बसेको पालिका कमिटी बैठकमा पूर्व अध्यक्ष शिवनारायण माझी, तुलशीराम विश्वास, कृष्णकुमार माझी, एकराज घिमिरे, आश नारायण माझी, तुलशी विश्वास, नमनारायण चौधरी, युवराज खनाल, निर्मला अधिकारी, नविनकुमार मण्डल र ध्रवकुमार श्रेष्ठ आकांक्षा व्यक्त गर्नु भएको हो ।
२०७९ मा सम्पन्न स्थानीय तह निर्वाचन एमालेका माझी नेपाली कांग्रेसका जयप्रकाश गच्छदारसँग १ हजार ५१२ मतान्तरले पराजित हुनु भएको थियो । २०७४ को स्थानीय तह निर्वाचनमा गच्छदार माझीसँग ५९ मतान्तरले पराजित हुनु भएको थियो ।
नेपाली कांग्रेसबाट निर्वाचित गच्छदारको असार ३ गते निधन भएपछि उप निर्वाचन हुन लागेको हो । उपनिर्वाचनका लागि नेकपा माओवादी केन्द्रले कांग्रेसबाट हालै पार्टी प्रवेश गरेका ग्रामथान १ का पूर्ववडाध्यक्ष नमोनारायण माझीलाई उम्मेदवार बनाउने निर्णय गरिसकेको छ ।
