विराटनगर २५ माघ । विराटनगरमा आगामी फागुन २२ गतेदेखि टि २० राष्ट्रिय क्रिकेट प्रतियोगिता हुने भएको छ । मोरङ जिल्ला क्रिकेट संघको आयोजनामा विराटनगरमा पहिलो पटक राष्ट्रिय स्तरको टि २० क्रिकेट प्रतियोगिता हुने भएको हो ।
मोरङ जिल्ला क्रिकेट संघले आज विराटनगरमा पत्रकार सम्मेलन गर्दै फागुन २२ देखि चैत ३ गतेसम्म विराटनगर १९ बैजनाथपुर स्थित गिरिजाप्रसाद कोइराला खेल मैदानमा प्रतियोगिता हुन लागेको हो । पत्रकार सम्मेलनमा संघका मोरङ अध्यक्ष मोहम्मद साद कुरैसीले प्रतियोगिताको लागि मैदान तयारीको काम तीव्ररुपमा भइरहेको बताउनुभयो ।
प्रतियोगिताका विजेताले ५ लाख रुपैया र उपविजेताले ३ लाख रुपैया हात पार्ने उहाँले बताउनुभयो । ७ प्रदेश र ३ वटा विभागिय नेपाल पुलिस, आर्मी र शसस्त्र प्रहरी टोलीबीच प्रतिस्पर्धा हुने प्रतियोगिताका लागि करिब ७५ लाख रुपैया खर्च हुने उहाँको भनाई छ । राउण्ड रोविनका आधारमा हुने प्रतियोगितामा १० टोलीले कुल २३ खेल खेल्नेछन् ।
पत्रकार सम्मेलनका क्रममा कोशी प्रदेश क्रिकेट संघका अध्यक्ष सर्वजीतराज पाण्डेले टी–२० लाई सफलतापूर्वक आयोजना गराउन सबै पक्षले सहयोग गर्नुपर्ने बताउनुभयो । क्यानको क्यालेण्डर अनुसार आयोजना हुने यस प्रतियोगिताले प्रदेशको क्रिकेट क्षमतालाई थप उजागर गर्न महत्वपूर्ण भूमिका खेल्ने उहाँको भनाई छ ।
