विराटनगर १४ मंसिर । ७२ औं राष्ट्रिय क्षयरोग नियन्त्रण दिवसको अवसरमा विराटनगरमा आयोजना गरिएको कार्यक्रममा सरोकारवालाले नेपाल सरकारले क्षयरोग नियन्त्रणमा पर्याप्त चासो नदिँदा संक्रमितको संख्या बढ्दै गएको गम्भीर चिन्ता व्यक्त गरेका छन ।
नेपाल क्षयरोग निवारण संस्था मोरङद्वारा आयोजित कार्यक्रममा विज्ञ एवं चिकित्सकले आगामी पुस्तालाई सुरक्षित राख्न क्षयरोग नियन्त्रणलाई उच्च प्राथमिकता दिनुपर्ने सुझाव दिए ।
कार्यक्रमका प्रमुख वक्ता डा. नारायण कुमारले अस्पताल, समुदाय तथा घरमै उपचार गर्ने विश्वव्यापी मान्यता र प्रभावकारी विधि नेपालले पूर्ण रूपमा अवलम्बन नगरेको कारण क्षयरोगीको संख्या बढिरहेको बताए । उनले क्षयरोग पूर्ण रूपमा निको हुने रोग हो, तर रोग ढिला पहिचान हुनु र उपचार समयमै नहुने समस्या अझै चुनौती बनीरहेको छ,सचेतना अभिवृद्धि अत्यावश्यक रहेको टिप्पणी गरे ।
कार्यक्रममा प्रस्तुत तथ्यांक अनुसार नेपालमा करिब ७० हजार क्षयरोगीमध्ये ४३ हजार मात्र पहिचानमा परेका छन्। बाकि हजारौँ संक्रमित पहिचानबाहिर रहेकाले संक्रमण तीव्र रूपमा फैलिरहेको सरोकारवालाको भनाइ छ ।
प्रत्येक वर्ष करिब १७ हजार व्यक्तिको क्षयरोगका कारण निधन हुनु देशको स्वास्थ्य क्षेत्रमा ठूलो चुनौती भएको पनि कार्यक्रममार्फत सार्वजनिक गरिएको थियो ।
वक्ताहरुले एक जना क्षयरोगीले आफ्नो आसपासका कम्तीमा १० जनासम्म रोग सार्न सक्ने जोखिम भएकाले सरकारले सहज उपचार, प्रभावकारी पहिचान र दिगो नियन्त्रण कार्यक्रमको व्यवस्था गर्नुपर्नेमा जोड दिए । ‘हामी सबैको प्रतिबद्धता र क्षयरोग नियन्त्रणमा सफलता’ भन्ने नारासहित सम्पन्न कार्यक्रममा सहभागीहरूले क्षयरोगमुक्त नेपाल निर्माण गर्न संयुक्त प्रयास अपरिहार्य भएको धारणा व्यक्त गरेका थिए ।
