विराटनगर १३ असोज । नेकपा एमाले कोशीले अविरल वर्षाका कारण देशभरमा भएको जनधन तथा भौतिक पूर्वाधारमा भएको क्षतिले देशमा गम्भीर संकट उत्पन्न भएको जनाएको छ ।
असोज ११ र १२ गतेको बर्षाका कारण देशको मुख्य राजमार्गमा भएको क्षतिको कारण यातायात अवरुद्ध भएको हुँदा तत्काल यातायात सुचारु गराउन, घाइतेहरूको तत्काल उपचार गर्न, मृत्यु भएका परिवारमा राहत तथा क्षतिग्रस्त भएका घरपरिवारहरूको पुनस्र्थापना तत्काल गर्न तीनै तहका सरकारको एमाले कोशीले ध्यानाकर्षण गराएको छ ।
कोशी प्रदेश कमिटीका अध्यक्ष घनस्याम खतिवडाले आज प्रेस विज्ञप्ति जारी गर्दै उद्धार, राहत र पुनर्निर्माणमा जुट्न तिनै तहका सरकार, राजनीतिक दल, संघसंस्था, निजी क्षेत्र र आमनागरिकलाई हार्दिक अपिल गर्नुभएको छ ।
नेकपा एमाले पार्टीमा आवद्ध सबै तहका नेता, कार्यकर्तालाई विपत्तिमा परेकाहरूलाई उद्धार, राहत र पुनस्र्थापनामा सहयोग गर्न र आपतकालीन सेवाहरूमा सहभागी हुन समेत अध्यक्ष खतिवडाले विशेष निर्देशन दिनुभएको छ ।
विज्ञप्तिमा भनिएको छ,‘ विपत्तिमा परि घाइते भएकाहरूको शीघ्र स्वास्थ्यलाभको कामना गर्दछौं, साथै विपत्तिमा ज्यान गुमाउने मृतक प्रति भावपूर्ण श्रद्धाञ्जली अर्पण गर्दै शोकाकुल परिवारजनमा हार्दिक समवेदना व्यक्त गर्दछौं ।’
