विराटनगर, १३ साउन । नेपाली कांग्रेसका केन्द्रीय सदस्य एवं सांसद डा शेखर कोइरालाले स्व. नोना कोइरालाले गरीव ,विपन्न एवं पछाडि परेका नागरिकहरुलाई स्वास्थ्य एवं शिक्षा क्षेत्रमा महत्वपूर्ण सहयोग उपलव्ध गराउनु भएको बताउनु भएको छ ।
नोना कोइराला स्मृति प्रतिष्ठानको आज विराटनगर–४ स्थित इक्राहीमा आयोजित साधारण सभामा उहाँले स्व. कोइरालाले सामाजिक न्याय, सामाजिक सुरक्षा, स्वास्थ्य, शिक्षाबाट कुनै पनि नागरिक वन्चित नहुन भन्ने इच्छालाई प्रतिष्ठानले पुरा गरेको विचार व्यक्त्त गर्नु भयो ।
संरक्षक समेत रहनु भएका डा. कोइरालाले प्रतिष्ठान सेवामुलक संस्था भएकोले मुलुकलाई आवश्यक पर्ने स्वास्थ्य क्षेत्रका दक्ष जनशक्ति उत्पादन गर्नु पर्ने आवश्यक्त्ता औल्याउनु भयो । उहाँले प्रतिष्ठानले विपदको समस्या नागरिकहरुको घर निर्माण गर्नुका साथै खाद्यान्न, स्वास्थ्य सेवा उपलव्ध गराएको जानकारी दिँदै यस कार्यलाई सञ्चारकर्मीहरुले उचित प्राथमिकता नदिएको गुनासो व्यक्त्त गर्नु भयो ।
विराटनगर महानगरपालिका प्रमुख नागेश कोइरालाले प्रजातन्त्र स्थापना र महिलाको हक हित स्थापनामा स्व. कोइरालाको ठूलो योगदान रहेको चर्चा गर्दै उहाँ समग्र देशवासीको आमाको रुपमा भूमिका निभाउनु भएको बताउनु भयो ।
प्रतिष्ठानका अध्यक्ष डा नारायण कुमार,उपाध्यक्ष हसन अन्सारी, गोपालमान सिंह राजभण्डारी, पूर्व प्रदेश सभा सदस्य शान्ता पौडेल, निर्मला कोइराला, निरन्जन रिजालले स्व. कोइरालाले देखाएको बाटो अनुसरण गरेमा गरीव एवं सीमाकृत नागरिक शिक्षा एवं स्वास्थ्य सेवा बन्चिन नहुने विचार राख्नु भयो । प्रतिष्ठानले आज नयाँ नेतृत्व चयन गर्ने बताइएको छ ।
