विराटनगर, ११ असोज । नेपाल अग्रवाल सभा विराटनगरको आयोजनामा अग्रसेन जयन्ती मनाइएको छ । सो अवसरमा मंगलबार शोभा यात्रा, ध्वजारोहण, आरती लगायतका विविध कार्यक्रम गरिएको जनाइएको छ ।
अग्रवाल समुदायको कुल प्रवर्तकका रुपमा रहेका अग्रसेनको जन्मजयन्तीको अवसरमा विराटनगरको अतिथि सदनमा आयोजित कार्यक्रममा सामुहिक गोठ प्रसाद वितरण गरेको जनाइएको छ । जयन्तीको उद्घाटन प्रदेश १ का भुमि व्यवस्था तथा गरिवी निवारणमन्त्री ओम प्रकाश सराबगीले गरेका हुन् । उनले नेपाल अग्रवाल सभा विराटनगरले अग्रसेन जयन्तीका अवसरमा विगतदेखि गर्दै आएको कामको चर्चा गरेका थिए ।
कार्यक्रममा बोल्दै नेपाल अग्रवाल सभा विराटनगरका अध्यक्ष विशाल केडीयाले अग्रवाल समुदायमा अग्रसेन महाराजलाई उच्च आदर्शको रुपमा लिएर हरेक काम गरिने गरेको बताए । उनैको स्मरणमा विशेष कार्यक्रम गरिएको बताए ।
अग्रसेन जयन्तीकै अवसरमा नेपाल अग्रवाल युवा मञ्च विराटनगरले बुधबार पनि विविध कार्यक्रम गर्ने जनाएको छ ।
