विराटनगर १४ मंसिर । नेकपा एमालेको ११ औं महाधिवेशन प्रतिनिधिमा मोरङबाट संविधानसभा सदस्य, पालिका प्रमुख तथा पार्टीका विभिन्न कमिटीका नेताहरु पराजित भएका छन् ।
शनिबार भएको महाधिवेशन प्रतिनिधिको निर्वाचनमा मोरङ ३ बाट संविधानसभा सदस्य रत्न गुरुङ (मधु), क्षेत्र नंं १ बाट लेटाङ नगर प्रमुख भूपेन्द्र लावती, उपप्रमुख कृष्णकुमारी पोखरेल, केराबारी गाउँपालिका अध्यक्ष सुमन मिरिङचिङ, मिक्लाजुङ गाउँपालिकाका पूर्व अध्यक्ष देवीप्रसाद आचार्य पराजित भएका छन् ।
एमाले मोरङका पूर्व अध्यक्ष बाबुराम कार्की, उर्लाबारी नगरकमिटीका पूर्व अध्यक्ष गंगा बाँस्तोला लगायतका जिल्ला कमिटी तथा प्रदेशका विभिन्न कमिटीमा रहेका नेताहरु महाधिवेशन प्रतिनिधिमा पराजित भएका छन् ।
संविधानभसभा सदस्य पर्तमान धिमाल, बेलबारीका नगरप्रमुख दिलप्रसाद राई, सुन्दरहरैचाका नगर प्रमुख केदारप्रसाद गुरागाइँ र पथरीशनिश्चरेका पूर्व नगरप्रमुख दिलिपकुमार राईले यसअघि नै उम्मेदवारी फिर्ता लिएका थिए ।
तीन प्रदेश सांसद विजयी
महाधिवेशन प्रतिनिधिमा मोरङबाट ३ जना प्रदेश सांसदहरुले उम्मेदवारी दिएका थिए । तीनै जना निर्वाचित भएका छन् । निर्वाचित हुनेमा ज्ञानेन्द्र सुवेदी, उमाकान्त गौतम र लीलाबल्लभ अधिकारी रहेका छन् ।
महाधिवेशन प्रतिनिधिमा उर्लाबारी नगरपालिका प्रमुख गंगा खरेल, सुनबर्षी नगरपालिका प्रमुख श्याम राजवंशी, रंगेली नगरपालिका प्रमुख दिलिप बगडिया, ग्रामथान गाउँपालिका उपप्रमुख गुणावतीदेवी थारु, कानेपोखरी गाउँपालिका उपप्रमुख भोला अधिकारी निर्वाचित भएका छन् ।
