विराटनगर ११ चैत । नेकपा एमाले निकट पत्रकारहरुको संगठन प्रेस चौतारी नेपालको नेतृत्वका लागि मतदान हुनुपर्ने मागसहित हस्ताक्षर संकलन अभियान सुरु भएको छ । आजबाट सुरु महाधिवेशनले नयाँ नेतृत्व चयन गर्नेछ ।
अध्यक्षमा नेकपा एमाले पार्टी नेतृत्वले हस्तक्षेप गर्दै गणेश पाण्डेलाई बनाउन निर्देशन दिएपछि प्रतिनिधिले निर्वाचनको माग गर्दै हस्ताक्षर अभियान सुरु गरेका हुन् । प्रेस चौतारीको अध्यक्षमा उपाध्यक्ष राजेश राईको पनि दाबी छ । अर्का दाबेदार पाण्डे पनि उपाध्यक्ष नै हुन् ।
महाधिवेशनबाट सर्वसम्मत नेतृत्व चयन गर्न नेताहरुले दबाब दिइरहेका छन् । तर प्रतिनिधिले कार्यक्रम हल बाहिर हस्ताक्षर अभियान सञ्चालन गरेका हुन् । ‘निर्वाचनका लागि हामीले हस्ताक्षर अभियान सुरु गरेका छौं, प्रजातान्त्रिक अभ्यास गर्नुपर्छ, २०७३ सालदेखि निर्वाचन भएको छैन,’ ताप्लेजुङबाट सहभागी प्रतिनिधि राजेन्द्र श्रेष्ठले भने,‘ चुनाव मार्फत नेतृत्व चयन गर्नुपर्छ ।’
