विराटनगर २५ फागुन । कोशी प्रदेशका प्रदेश प्रमुख परशुराम खापुङ्ग साहित्यको माध्यमले मुलुकमा फैलिएका विकृति र विसङ्गति अन्त्यमा महत्वपूर्ण पुगेको बताउनु भयो ।
उद्घोष दैनिक विराटनगरद्वारा आज विराटनगरमा आयोजित कार्यक्रममा ‘लक्ष्मणको कुनो ‘१०००’ स्तम्भ अङ्क पुगेको उपलक्ष्यमा साहित्यकार लक्ष्मण नेटविया साहित्य सम्मान एवं विभिन्न कृतिको विमोचन गर्दै उहाँले मुलुकमा ठूल–ठूला आन्दोलन र सङ्घीय गणतन्त्र स्थापनामा साहित्यकारहरुको महत्वपूर्ण योगदान गरेको चर्चा गर्नु भयो । प्रदेश प्रमुख खापुङ्गले साहित्यकारहरुले आफ्नो कमल माफर्त मुलुकमा सामाजिक सद्भाव,हिमाल, तराई तथा पहाडका जनता वीच आपसी एक कायम गर्नु गर्नुपर्नेमा जोड दिनु भयो ।
विराटनगर महापालिकाका प्रमुख नागेश कोइरालाले मुलुकको आर्थिक समृद्धि तथा साहित्य क्षेत्रमा नेवटियाको योगदान अतुलनीय रहेको बताउनु भयो । साहित्यकार प्रमोद प्रधानले नेटवटियाको तेस्रो भाषा रहेको नेपाली भाषाको साहित्य क्षेत्रमा विस २०३१ देखि सक्रियरुपमा क्रियाशिल हुनु भएको चर्चा गर्नु भयो ।उद्घोष दैनिक प्रधान सम्पादक मोहन भण्डारी, कार्यक्रम संयोजक भीखमचन्द सरल, भारतीय साहित्यकार कल्याण सिंह शेखावतले नेटवटियाले नेपाली तथा हिन्दी साहित्यमा महत्वपूर्ण योगदान दिएको बताउनु भएको छ ।
प्रदेश प्रमुख खापुङ्गले नेवटियाद्वारा नेपाली तथा हिन्दीमा लिखित विभिन्न पुस्तकहरुको विमोचन गर्नु भएको थियो ।
