
विराटनगर २२ फागुन । विराटनगरमा जारी ‘विराट गोल्ड कप’ फुटबल प्रतियोगिता अन्तर्गतका बुधबारराती सम्पन्न पहिलो क्वाटर फाइनल खेलमा नेपाली सेनाको त्रिभुवन आर्मी क्लव विजयी भएको छ । विराट गोल्ड कप ट्रष्टद्वारा आयोजित रात्रिकालिन उक्त प्रतियोगितामा त्रिभुवन आर्मी क्लवले रिजालको मोरङ एफ सि लाई १–० गोलले पराजित गरेको छ ।
प्रतियोगिताको मध्यान्तर अगाडि ३७ मिनेटमा त्रिभुवन आर्मी क्लवका जर्सी नं ११ का खेलाडी नराज चौधरीले गोल गरी आफ्नो क्लवलाई सेमिफाइनलमा पुर्याउन सफल भएका छन् ।
खेलको म्यान अफ दि म्याच त्रिभुवन आर्मी क्लवका बिकेश कुथुलाई रु ११ हजार नगद प्रदान गरिएको छ । शुक्रबारको दोस्रो क्वाटरफानल खेल दुई विभागीय टीम नेपाल प्रहरीको महेन्द्र पुसिल क्लव र सशस्त्र प्रहरी बलको एपिएफ एफ सि बीच साँझ ६ः३० बजे हुने ट्रष्टले जनाएको छ ।
प्रतियोगितामा भारतका दुई र नेपालका विभागीय टिम सहित १० वटा टिम सहभागी रहेका छन् । प्रतियोगितको विजेतालाई नगद रु ११ लाख, उपविजेतालाई रु पाँच लाख, उत्कृष्ट प्रशिक्षक, उत्कृष्ट गोलरक्षक र सर्वाधिक गोलकर्तालाई जनही रु १५ हजार, दैनिक हुने खेलको उत्कृष्ट खेलाडीलाई रु ११ हजार र सर्वोत्कृष्ट खेलाडीलाई रु ५१ हजार नगद पुरस्कार दिइने प्रबन्ध गरिएको छ ।