विराट गोल्डकप : दुवै पाहुना टोली बाहिरिए

विराटनगर २१ फागुन । विभागीय टोली सशस्त्र प्रहरी बल एपीएफ विराटनगरमा जारी विराट गोल्डकप फुटबल प्रतियोगिताको क्वार्टर फाइनलमा प्रवेश गरेको छ ।

विराटनगरको सहिद रंगशालामा मंगलबार राति सम्पन्न खेलमा पाहुना टोली भारतको शुभेदा दिल्ली फुटबल क्लबलाई टाइब्रेकरमा ५–३ गोल अन्तरले निराश बनाउँदै एपीएफले प्रतियोगितामा विजयी सुरुवात गरेको हो ।

रोमाञ्चक एवं प्रतिस्पर्धात्मक खेलको निर्धारित समय गोलरहित बराबरीमा सकिएको थियो । निर्धारित समयमा दुवै टोलीबाट गोल हुन नसकेपछि खेलको निर्णय टाइब्रेकरबाट लिइएको हो । समय सीमाभित्र दुवै टोलीले उत्कृष्ट एवं राम्रा अवसरको सदुपयोग गर्न सकेनन् । जसका कारण खेल टाइब्रेकरमा धकेलियो । बारम्बारको महत्वपूर्ण अवसर खेर जाँदा पाहुना टोली शुभेदा दिल्ली फुटबल क्लब अभागी ठहरियो । नेपालको विभागीय टोलीसँग स्तब्ध हुँदै पहिलो खेलबाटै घर फर्किन बाध्य भयो ।

एपीएफले निर्धारित समयमा गोल फर्काउन नसक्दा जित निकाल्न टाइब्रेकरसम्म पुग्नु पर्याे । टाइब्रेकरमा एपीएफका सुमन श्रेष्ठ, दिपेश धिमाल, मणिकुमार लामा, सविन गुरुङ र अनिल श्रेष्ठले गोल गरेका थिए । शुभेदा दिल्लीका तर्फबाट राहिथ, पीसी र उदितको प्रहारले मात्रै जाली चुमेको थियो । रमेशको प्रहारमा एपीएफका गोलरक्षक एन्जल श्रेष्ठ बाधक बने । श्रेष्ठ खेलको प्लेयर अफ दी म्याच घोषित भए । विराटनगरको प्रतिष्ठासँग जोडिएको ऐतिहासिक प्रतियोगितामा २ वटा भारतीय टिमको सहभागिता रहेको थियो । तर, दुवै टिम हार बेहोर्दै घर फर्किएका छन् ।

सोमबार राति सम्पन्न पहिलो खेलमा आयोजक मोरङ रिजालको एफएले भारतको साउथन समिति कोलकातालाई ३–२ गोल अन्तरले पराजित गरेको थियो । बुधबार विभागीय टोली त्रिभुवन आर्मी क्लब र आयोजक मोरङ रिजालको एफएबीच प्रतिस्पर्धा हुने छ ।