विराटनगर १८ फागुन । नेकपा एमाले मोरङको १० औं जिल्ला अधिवेशन विराटनगरमा जारी छ । अधिवेशनका दोश्रो दिन आज बन्द शत्रमा राजनीतिक, सांगठनिक र आर्थिक प्रतिवेदन प्रस्तुत गरिएको छ । राजनीतिक प्रतिवेदनमा एमाले मोरङले प्रमुख प्रतिष्पर्धी नेपाली कांग्रेसलाई लिएको छ ।
केन्द्र र प्रदेश सरकारमा सत्तासहकार्य भएता पनि नेकपा (एमाले)को चुनावी प्रमुख प्रतिस्पर्धी दल नेपाली कांग्रेस नै भएको प्रतिवेदनमा उल्लेख छ । जिल्लामा जनाधार र सदस्यताको आधारमा पनि नेपाली काग्रेस मोरङ जिल्लाको एक प्रमुख राजनीतिक पार्टी भएको जनाईएको छ । एमाले प्रतिवेदनमा भनिएको छ– ‘पुरानो राजनीतिक पृष्ठभूमि भएका कांग्रेसी कार्यकर्ताहरू अहिले पार्टीले प्रजातान्त्रिक समाजवादको धार छाडेकोमा असन्तुष्ट छन् ।’
नेकपा माओवादी केन्द्रलाई एमालेले सशस्त्र द्वन्द्वको धधँगीबाट बाहिर निस्कन नसकेको उल्लेख गरेको छ । नेपाली कांग्रेसलगायतका दलहरूसँगको गठबन्धनले स्थानीय, प्रादेशिक एवम् राष्ट्रिय चुनावमा प्रतिनिधि सभामा १ र प्रदेश सभामा प्रत्यक्षतर्फ २ सहित ३ जना निर्वाचित भएको प्रतिवेदनमा भनिएको छ । एमालेले माओवादी केन्द्रको नेतृत्वले अवसरवादी नीति लिँदै आएको र ढुलमुले चरित्र रहेको कारण देशमा स्थायी सरकार निर्माणको बाधकको रूपमा देखिएको जनाएको छ । हिंसाप्रिय उग्रवामपन्थ विगत र चरम दक्षिणपन्थ अवसरवादी नीति वर्तमानमा भएकोले यस पार्टीले देश विकास र जनताको भविष्य निर्माण गर्ने अभियानको नेतृत्व गर्न सक्ने अवस्था नरहेको प्रतिवेदनमा भनिएको छ ।
एमालेले प्रतिवेदनमा मधेसको मुद्दामा केन्द्रित भएर राजनीति गर्दै आएको जनता समाजवादी पार्टी मोरङको चौथो राजनीतिक शक्ति भएको तर पछिल्ला दिनहरूमा जनमत पार्टीले पनि जिल्लाको दक्षिणी भेगका गतिविधिहरूमा सक्रियता बढाएको उल्लेख छ । पहिचानवादीहरूलाई समेत यी दलहरूले समर्थन गर्दै आएको र कुमार लिङ्देनले नेतृत्व गरेको सङ्घीय लिम्बुवान परिषद्ले पनि मोरङ जिल्लामा बेलाबेलामा गतिविधि गरेको पाइएको राजनीतिक प्रतिवेदनमा भनिएको छ ।
राष्ट्रिय स्वतन्त्र पार्टीलाई एमालेले सहरी क्षेत्रमा सामाजिक सञ्जालको दुरूपयोग गर्दै विदेशमा बसेका युवा तथा वैदेशिक रोजगारमा गएकाहरूको परिवारहरूको जनमतलाई आफ्नो पक्षमा पार्न उद्धत देखिएको टिप्पणी गरेको छ ।
नेकपा एकीकृत समाजवादी पार्टीलाई एमालेबाट चोइटिएर बनेको र आफ्नो अस्तित्व जोगाउन व्यस्त रहेको उल्लेख गरेको छ । निर्वाचनमा आफ्नो अस्तित्व बनाउने भन्दा पनि नेकपा (एमाले) लाई हराउनुलाई आफ्नो विजय ठान्ने गरेको प्रतिवेदनमा उल्लेख छ ।
राष्ट्रिय प्रजातान्त्र पार्टीलाई एमालेले हिन्दुराष्ट्र फर्काउने भन्दै अराजक गरिविधिहरू गर्ने गरेको जनाएको छ । नेकपा (माले) र नेकमकिपा जस्ता साना वामपन्थी दलहरू धेरै पहिलेदेखि मोरङमा अस्तित्वमा रहेपनि विप्लव नेतृत्वको नेकपा र डा. बाबुराम भट्टराई नेतृत्वको नेपाल समाजवादी पार्टी (जनशक्ति) को प्रभाव पनि केही मात्रामा रहेको एमालेले प्रतिवेदनमा उल्लेख गरेको छ ।
