विराटनगर १७ फागुन । नेकपा (एमाले)को मोरङको १० औं जिल्ला अधिवेशन आजदेखि विराटनगरमा शुरु हुँदैछ ।
अधिवेशनको प्रधानमन्त्री तथा पार्टीका केन्द्रीय अध्यक्ष केपी शर्मा ओलीले विहान साढे ११ वजे उद्घाटन गर्ने कार्यक्रम रहेको छ । विराटनगरको होटल मनास्लु इनमा फागुन १९ गतेसम्म चल्ने अधिवेशनले १ सय ६५ सदस्यीय नयाँ नेतृत्व चयन गर्नेछ ।
जिल्ला अधिवेशनका लागि ९ सय १४ जना प्रतिनिधि छानिएका छन् । जसमध्ये १७ वटा स्थानीय तहको १ सय ५९ वडाबाट ६ सय ९२ जना, २३ वटा जनवर्गीय संगठनबाट १ सय १ जना, विशेष क्षेत्रबाट २४ जना, दलित ५१ जना र मनोनित ४६ गरी ९ सय १४ जना प्रतिनिधि चयन गरिएको एमाले मोरङका अध्यक्ष बाबुराम कार्कीले बताउनुभयो ।
अध्यक्ष कार्कीका अनुसार जिल्लाको नयाँ नेतृत्व सर्वसम्मत रुपमा छनोट गर्ने अधिकतम प्रयास रहनेछ । एमाले मोरङको अध्यक्षमा कार्कीसहित राजकुमार ओझा र अजम्बर राई आकांक्षी देखिएका छन् । नेतृत्व चयन सर्वसम्मत नभए निर्वाचन हुने बताईएको छ ।
