विराटनगर १५ फागुन । नेकपा (एमाले)को मोरङको १० औं जिल्ला अधिवेशन प्रधानमन्त्री तथा पार्टीका केन्द्रीय अध्यक्ष केपी शर्मा ओलीले उद्घाटन गर्ने भएका छन् ।
एमाले मोरङको जिल्ला अधिवेशन शनिबारबाट सुरु हुँदैछ । फागुन १९ गतेसम्म चल्ने अधिवेशनले अधिवेशनले १ सय ६५ सदस्यीय नयाँ नेतृत्व चयन गर्नेछ ।
एमाले मोरङ अध्यक्ष बाबुराम कार्कीले आज (बिहीबार) पत्रकार सम्मेलन गर्दै अधिवेशनको तयारी लगभग पूरा भएको जानकारी दिए ।
जिल्ला अधिवेशनका लागि ९ सय १४ जना प्रतिनिधि छानिएका छन् । जसमध्ये १७ वटा स्थानीय तहको १ सय ५९ वडाबाट ६ सय ९२ जना, २३ वटा जनवर्गीय संगठनबाट १ सय १ जना, विशेष क्षेत्रबाट २४ जना, दलित ५१ जना र मनोनित ४६ गरी ९ सय १४ जना प्रतिनिधि चयन गरिएको कार्कीले बताए ।
फागुन १९ गतेसम्म चल्ने अधिवेशनमा सहभागी हुने प्रतिनिधिको अन्तिम टुंगो बिहीबार लगाएको हो । अध्यक्ष कार्कीका अनुसार जिल्लाको नयाँ नेतृत्व सर्वसम्मत रुपमा छनोट गर्ने अधिकतम प्रयास रहनेछ ।
एमाले मोरङको अध्यक्षमा कार्कीसहित राजकुमार ओझा र अजम्बर राई आकांक्षी देखिएका छन् । नेतृत्व चयन सर्वसम्मत नभए निर्वाचन हुने छ ।
