विराटनगर, १९ मंसिर । मोरङको कटहरी गाँउपालिकामा ६ वटा वडा कार्यालयहरु आफ्नै भवनबाट सञ्चालन हुन थालेका छन् ।
७ वटा वडाहरु रहेको कटहरी गाँउपालिकामा वडा नं. ६ को वडा कार्यालय कहाँ राख्ने भन्ने विवादका कारण निर्माण शुरु नै हुन सकेको छैन । वडा नं. ५ उद्घाटन भए संगै ६ वटा वडाहरु आफ्नै भवनमा संचालनमा आएको हो ।
वडा नं. ५ को नवनिर्मित वडा कार्यालय भवनको कटहरी गाँउपालिकाका अध्यक्ष देवराज चौधरीले एक कार्यक्रम बीच उद्घाटन गर्नुभएपछि सोही भवनबाट कार्यालय सञ्चालन थालिएको छ ।
भवन उद्घाटन कार्यक्रममा अध्यक्ष देवराज चौधरीले आफुहरु निर्वाचित भएर आएपछि वडा कार्यालयहरु मात्र होइन अन्य कार्यालयहरु पनि निर्माण सम्पन्न गर्ने र भाडामा नबस्ने नीति लिएको जानकारी दिनुभयो । उहाँले विकास निर्माणको कार्यमा राजनीति नगरिए समय मै योजना सम्पन्न हुने धारणा व्यक्त गर्नुभयो ।
वडा नंं. ५ को वडा कार्यालय भवन करिब ५९ लाख ६० हजार रुपैयामा निर्माण गरिएको हो । ४ वटा कोठाहरु र एउटा हल रहेको सो एक तले वडा कार्यालय भवनको बाउण्ड्री वाल र पार्किङ करिब १३ लाख २१ हजार रुपैयामा निर्माण सम्पन्न भएको कटहरी गाँउपालिकाले जनाएको छ ।
