विराटनगर, २२ बैशाख । नेपाली कांग्रेसका केन्द्रीय सदस्य भीम पराजुलीले मुलुकमा राजनीतिक स्थिरता कायम गर्न ठूला दल मिलेर सरकार बनाउनुपर्ने बताउनु भएको छ । नेपाली कांग्रेस विराटनगर १ ले आयोजना गरेको कार्यक्रममा बोल्दै केन्द्रीय सदस्य पराजुलीले यस्तो बताउनु भएको हो ।
विगतमा राजनीतिक अस्थिरताकै कारणले मुलुकले धेरै क्षति व्यहोरेको प्रसङ्ग उल्लेख गर्दै उनले स्थिर सरकारले मात्र देशमा समृद्धि आउने र यसका लागि कांग्रेस र एमाले मिल्नुपर्नेमा जोड दिनुभयो ।
कांग्रेस र एमाले मिलेर सरकार बनोस् भन्ने जनमतलाई अंगिकार नगर्दा देशमा राजनैतिक अस्थिरता उत्पन्न भएको नेता पराजुलीको धारणा थियो । कांग्रेस र एमाले मिलेर वर्तमान निर्वाचन प्रणाली फेर्न आवश्यक भएको र त्यसका लागि ठूला राजनैतिक दल मिलेर अगाडि बढ्न आवश्यक रहेको उल्लेख गर्नुभयो ।
मुलुकका हरेक परिवर्तनमा कांग्रेसले नेतृत्वदायी भूमिका निर्वाह गरेको उनले स्मरण गर्नुभयोे । उहाँले पार्टीलाई एक ढिक्का बनाएर लैजानुको विकल्प नभएकोसमेत बताउनुभयो ।
