विराटनगर २७ असोज । हिमालय मातृभूमी फाउण्डेसनको अवधारणा पत्र सार्वजनिक गरिएको छ । गैर नाफामूलक सामाजिक संस्थाको रूपमा स्थापित फाउण्डेसनले विराटनगरमा एक औपचारिक कार्यक्रमका बिच अवधारणा पत्र सार्वजनिक गरेको हो ।
फाउण्डेसनको ‘सुशासन, विकास र समृद्धीको लागि राष्ट्रिय अभियान–२०८०’ को अवधारणा–पत्र सार्वजनिक गरियो । कार्यक्रममा बोल्दै फाउण्डेसनका अध्यक्ष टिकाराम पुरीले अति राजनीतिकरणले देश अधोगति तर्फ लागेको भन्दै अब राजनीतिमा देखिएको भ्रष्टिकरणलाई परास्त गर्नुपर्ने आवश्यकता रहेको बताउनुभयो । राजनीति कहाँसम्म गर्ने भन्ने सीमा निर्धारण नहुँदा सबै पक्ष अस्तव्यस्त रहेको भन्दै उहाँले भन्नुभयो,‘राजनीति के–के मा गर्ने? न्यायालयमा, सुरक्षा निकायमा, शैक्षिक क्षेत्रमा पनि राजनीति गर्न हुन्छ? ‘त्यहाँ पनि राजनीतिक भागबण्डा हुँदा देश विग्रने उहाँले बताउनुभयो । सबै तिर असफल भएका वा केहि गर्न नसक्नेहरुले राजनीति गर्ने मान्यता त स्थापित हुँदैछैन भन्दै उहाँले राजनीतिमा सक्रिय नेता त झन आय आर्जन र उत्पादनसँग जोडिनै पर्ने बताउनुभयो । ‘देशमा कमाइ खाने वर्गलाई माफिया करार गरिन्छ,’ उहाँले भन्नुभयो,‘सामान्य मान्छेको नजरमा लुटेराको परिचय बनाइदिने काम यीनै राजनीतिकर्मीहरूले बनाएको हो ।’ अध्यक्ष पुरीले आफै कमाएर खाने वर्गले मुलुकको नेतृत्व नगर्दा सम्म मुलुक समृद्ध हुन नसक्ने समेत बताउनु भयो ।
अहिलेका प्रमुख राजनीतिक दलहरुले देशमा ठूला–ठूला राजनैतिक परिवर्तन ल्याउन अहम् भूमिका खेलेको भूल्न नहुने बताउनुभएका पुरीले तर त्यसकै बलमा राजनीतिमा घुसेको भ्रष्टीकरणको चर्काे विरोध गर्नुपर्ने बताउनुभयो । मुलुक संघीय लोकतान्त्रिक गणतन्त्र सम्म ल्याउन यीनै दलहरुको भूमिका रहेपनि पछिल्लो समय खुलेका भ्रष्टचार, अनियमितता फायलहरु दलकै मिलिभगतमा सामसुम हुने गरेको उहाँले कटाक्ष गर्नुभयो । नेपालको राजनीति सधै अस्थिर रहने गरेको भन्दै उहाँले अहिलेको निर्वाचन प्रणाली नै बदल्न आवश्यक रहेको बताउनुभयो ।
आर्थिक अवस्थामा देश अधोगती तिर लागेको चर्चा गर्दै उहाँल नेपालका युवा पुस्ता जसरी अहिले विश्वका विभिन्न मुलुकहरुमा पलायन भइरहेका छन् त्यसले समृद्ध मुलुकको कल्पना गर्न नसकिने बताउनुभयो । उहाँले भन्नुभयो,‘ विभिन्न बाध्यताले जसरी युवाहरु दैनिक विदेश पलायन भइरहेका छन्, यसले युवा विहिन राष्ट्र नेपाल हुने बाटोतर्फ अग्रसर भइरहेको छ ।’ युवा नभएको देशमा जेष्ठ नागरिक र बालबालिका मात्रै भएर देशको विकास सम्भव नभएको उहाँले बताउनुभयो । यस्तै उहाँले संघीयता आवश्यक रहेपनि संरचनामा केहि सुधार गर्नुपर्ने आवश्यकता रहेको औल्याउनुभयो ।
घाटा बजेटमा मुलुक धेरै दिन टिक्न नसक्ने भन्दै उहाँले देशमा उत्पादनको वातावरण बनाउन राज्यलाई दवाव दिन आवश्यक रहेको बताउनुभयो । उहाँले फाउण्डेसनले चालेको यो अभियानलाई देशभर र्पुयाउने र राज्यलाई सुसाशनका लागि दवाव सृजना गर्ने बताउनुभयो ।
फाउण्डेसनका महासचिव कुमार घिमिरेले सञ्चालन गर्नु भएको अवधारणा पत्र सार्वजनिकरण कार्यक्रममा राजनीतिशास्त्री कृष्ण पोखरेल , राजनीति विश्लेषक दिनेश श्रेष्ठ, प्याब्सनका अध्यक्ष डिके ढुङ्गाना, पूर्व राजदूत महेश दाहाल र गैरसरकारी संस्थाको तर्फ बाट विष्णु शर्मा लगायतले मन्तव्य व्यक्त गर्दै राजनीतिक दल र राज्यका कमजोरी औल्याउँदै समृद्ध मुलुक बनाउन सचेत वर्गले बोल्ने बेला आएको बताउनुभयो ।
