इलाम, २६ चैत । इलाममा चियाको पहिलो टिपाई सुरु भएको छ । पहिलो टिपाईलाई ‘फस्ट फल्स’ समेत भनेर चिनिने पहिलो टिपाई अन्य सिजनको भन्दा गुणस्तरीय चिया मानिन्छ ।

जिल्लाको तल्लो क्षेत्रमा चियाको मुना पलाउन थालेसँगै टिपाई सुरु भएको हो । माथिल्लो क्षेत्रमा भने चिया पलाउन सुरु मात्र भएको छ । दुई पात एक सुइरो भएको चिया टिप्न सबैभन्दा राम्रो मानिन्छ । गत कात्तिकदेखि बाँझी बसेको चिया पुनः पलाउन थालेसँगै चिया टिपाइ सुरु भएको हो । यससँगै जिल्लाका चिया कारखानाले प्रशोधनको तयारी समेत थालेको बताइएको छ । केही कारखानाले उत्पादनसमेत सुरु गरेका छन् ।

यसरी केही समयसम्म फुर्सद रहेका चिया तथा कारखाना मजदूरको कार्य व्यस्तता अहिले बढेको छ । पहिलो उत्पादन गुणस्तरीय हुने भएकाले बजारमा पहुँच बढाउनसमेत चियापत्तीको टिपाइ छिट्टै थालिएको हो । यस वर्ष मौसमले पनि चिया किसानलाई साथ दिएको छ । यस वर्ष समयमा नै पानी परेकाले चिया किसानसमेत हर्षित छन् । जिल्लाका लेकाली क्षेत्रमा भने अझै पूर्णरुपमा चिया पलाउन सकेको छैन् ।

गर्मी बढेका क्षेत्रमा चियापत्ती टिप्न सुरु गरिएको हो । उत्पादन कम भए पनि फस्ट फ्लस चियाको मूल्य उच्च हुने भएकाले किसानले छिट्टै चियापत्ती टिपाइ सुरु गरेका हुन् ।