विराटनगर, ३० पुस । प्रदेश १ की उपसभामुख सिर्जना दनुवारले पद तथा गोपनियाताको सपथ लिनुभएको छ ।
आज उपसभामुख दनुवारले प्रदेश १ का सभामुख बाबुराम गौतमबाट पद तथा गोपनियताको सपथ लिनुभएको हो । आजकै प्रदेशसभा बैठकबाट बहुमतका आधारमा उपसभामुख पदमा दनुवार निर्वाचित हुनुभएको थियो । प्रदेशसभा सचिवालयमा भएको उपसभामुख निर्वाचनमा दनुवारको पक्षमा ५७ मत परेको थियो ।
मतदानमा ९० जना सांसदहरुको सहभागिता थियो । दनुवारको प्रस्तावकमा माओवादी केन्द्रका प्रदेश सांसद नारायण बुर्जामगर र समर्थकमा राप्रपाकी सबिजा बजगाईँ रहनुभएको थियो । उपसभामुख पदमा नेपाली कांग्रेसकी सांसद लिलाकुमारी राईले पनि उम्मेदवारी दिनुभएको थियो । उहाँको पक्षमा ३३ मत मात्रै परेको थियो ।
प्रदेश सभामा एमालेका ४०, कांग्रेसको २९, नेकपा माओवादी केन्द्रका १३, राप्रपाका ६, नेकपा एकीकृत समाजवादीका ४ र जसपाका १ सदस्य गरी ९३ सदस्य रहेका छन् । सत्ता गठबन्धनमा एमाले, माओवादी, राप्रपा र जसपाको गरी ६० सांसद छन् । उपसभामुखमा निर्वाचित दनुवार उदयपुरबाट समानुपातिक कोटाबाट निर्वाचित सांसद हुनुहुन्छ ।
