विराटनगर, १५ भदौ । मोरङ जिल्लामा गत आठ महिनाको अवधिमा राज्यको नियन्त्रणमा रहेका एक महिला सहित आठ जना व्यक्तिको मृत्यू भएको छ ।
मोरङमा २०८१ पुस २० गतेदेखि ०८२ भदौ १५ गतेसम्मको आठ महिनाको अवधिमा राज्यको नियन्त्रणमा रहेका आठ जनाको मृत्यू भएको कुरा मानव अधिकारबादी संस्था अनौपचारिक क्षेत्र सेवा केन्द्र (इन्सेक) को विराटनगर कार्यालयले जनाएको छ । यस अवधिमा जिल्ला प्रहरी कार्यालय मोरङको हिरासतमा एक जना र अरु सातको मोरङ कारागारमा मृत्यु भएको हो ।
सुनसरीको बराहक्षेत्र नगरपालिका–६ की ३२ वर्षीया राधिका भट्टराइको मृत्यु भएको कुरा सबै भन्दा पछिल्लो घटना हो । उनी यही भदौ ११ गते मोरङ कारागारको महिला सुधारगृहमा रहेको शौचालयमा झुण्डिएर मृत्यू भएको अवस्थामा फेला परेकी थिइन् ।
राधिका भट्टराईको मृत्यू भएपछि इन्सेक लगायतका मानव अधिकारबादी संस्थाहरुले कारागाराको अनुगमन गरेपछि आठ महिनाको अवधिमा राज्यको नियन्त्रणमा रहेका आठ जनाको मृत्यू भएको तथ्य सार्वजनिक भएको हो ।
मोरङको वेलवारी नगरपालिका–४ का ६७ वर्षीय अम्बरबहादुर राईको ०८१ पुस २० गते मोरङ कारागारमा मृत्यु भएको थियो । त्यसयता कारागारमा रहेका ६ जनाको मृत्यू भइसकेको छ । राज्यको सुरक्षा र नियन्त्रण घेरामा रहेकाहरुको नियमित जस्तो मृत्यु हुनु ले कारागार सुरक्षित भन्दा असुरक्षित हुँदै गएको कुरा मानव अधिकारबादी संस्थाहरुले बताएका छन् ।
यस अवधिमा मोरङ्ग कारागारमा रहेका पथरी शनिश्चरे नगरपालिका–४ का ३८ वर्षीय जेठा भनिने जितबहादुर देवानको ०८१ फागुन २९ गते, उर्लावारी नगरपालिका–१ का ४३ वर्षीय मित्रकुमार दनुवारको ०८२ वैशाख १५ गते, रामेछापको दोरम्बा शैलुङ्ग गाउँपालिका–२ का ५४ वर्षीय प्रविण तामाङ्गको ०८२ वैशाख २९ गते, सुनवर्षी नगरपालिका–२ का २४ वर्षीय उमेश दर्जीको ०८२ असार १० गते, विराटनगर महानगरपालिका–५ का ४० वर्षीय सन्तोष पालको ०८२ असार २५ गते कारागारमा मृत्यु भएको छ ।
जिल्ला प्रहरी कार्यालयको हिरासतमा रहेका झापाको दमक नगरपालिका–१ का २८ वर्षीय पुण्यबहादुर श्रेष्ठको ०८२ जेठ २० गते मृत्यु भएको कुरा इन्सेक कोशी प्रदेश संयोजक मनोहर कुमार पोखरेलले बताउनु भएको छ ।
राज्यको नियन्त्रणमा रहेकाहरुको एकपछि अर्को मृत्यु हुँदै गएपछि इन्सेकसहित मानव अधिकारको क्षेत्रमा क्रियाशील संघसंस्थाका प्रतिनिधिले भदौ १३ गते मोरङ कारागारको अनुगमन गरेका थिए । इन्सेक कोशी प्रदेश संयोजक मनोहरकुमार पोखेरलको नेतृत्वमा बाल अधिकारकर्मी वासु अधिकारी, महिला अधिकारकर्मी शोभा बजगाई, गैसस महासंघकी अध्यक्ष विष्णु शर्मा, मनोविमर्शकर्ता गीताञ्जली शर्मासहितको टोलीले जिल्ला कारागारको अनुगमनका साथै कारागार प्रशासकसँग कारागारको अवस्थाका बारेमा जानकारी लिएको हो ।
