विराटनगर १५ माघ । नेकपा एमालेका नेता जीवन घिमिरेले लेख्नु भएको ‘कमरेड हिजो र आज’ पुस्तकको आगामी शनिबार विराटनगरमा विमोचन गरिने भएको छ ।
प्रगतिशिल लेखक संघ नेपाल मोरङको आयोजनामा प्रतिनिधिसभाका सभामुख देवराज घिमिरेले पुस्तकको विमोचन गर्नु हुने छ ।
एमाले केन्द्रीय सदस्य तथा कोशी प्रदेशका पूर्व मन्त्री घिमिरेले वि.सं २०३६–०४६ सम्मको आन्दोलनलाई समेटेर पुस्तक तयार गर्नु भएको हो । पार्टी राजनीतिकसँग जोडिएका घटनाहरु, सो घटनामा संंलग्न करिव ४ सय पात्रहरुका विषयहरु पुस्तकमा समेटिएको लेखक घिमिरेले बताउनुभयो । उहाँका अनुसार ‘कमरेड हिजो र आज’ श्रोत पुस्तकको हो ।
पुस्तकमा पूर्व प्रधानमन्त्री मनमोहन अधिकारी, गिरीजाप्रसाद कोइराला, जननेता मदन भण्डारी लगायत ४ सय पात्रहरु रहेको घिमिरेले बताउनुभयो । करिव एक वर्षमा पुस्तक तयार गरिएको उहाँले बताउनुभयो । उहाँले भन्नुभयो,‘ पुस्तकले विशेषगरि झापा, मोरङ र सुनसरीको राजनीतिलाई केन्द्रीत गरेको छ । हिजो उच्च योगदान भएका र हाल पछि परेकाहरुको पुस्तक मार्फत परिचय गराउन कोशिस गरिएको छ ।’
२०३६–०४६ आन्दोलनका समयका पात्रहरुका बारेमा शोध गर्न चाहनेहरुका लागि पुस्तक उपयोगी श्रोत हुने घिमिरेको भनाई छ । पुस्तकको विमोचनका अवसरमा पुस्तकमा समेटिएका पात्रहरुलाई सम्मान गरिने लेखक घिमिरेले जानकारी दिनुभयो ।
