विराटनगर ३१ असार । आर्थिक वर्षको अन्तमा मात्रै कार्यक्रम हुने गरेको आलोचना भएपछि कोशी प्रदेश सरकारले साउन देखिनै विकासे कार्यक्रमहरूलाई अगाडी बढाउने तयारी गरेको छ । कोशी प्रदेशका मुख्यमन्त्री हिक्मतकुमार कार्कीले असारको अन्तिममा नै प्रदेशका प्रमुख सचिवसँग कार्य सम्पादन सम्झौता गरेर कामलाई अगाडी बढाउन सुरु गर्नुभएको छ ।
प्रदेश सुशासन (व्यवस्थापन तथा सञ्चालन) ऐन २०७६ र नियमावली २०७७ बमोजिम मुख्यमन्त्री कार्कीले साउन १ गतेदेखि नै लागू हुने गरी कार्य सम्झौता गर्नुभएको हो । प्रदेश सरकारका सबै मन्त्रीहरूलाई राखेर मुख्यमन्त्री कार्यालयका प्रमुख केदारनाथ शर्मासँग कार्य सम्पादन सम्झौता गरेपछि शर्माले मुख्यमन्त्रीकै उपस्थितिमा मुख्यमन्त्री कार्यालयका सचिव बद्री कार्की र विष्णुप्रसाद पौडेलसँग सम्झौता गर्नुभएको छ ।
मुख्यमन्त्री कार्कीले साउन १५ भित्र सबै मन्त्रीलाई सचिवसँग र सचिवले मातहतका कार्यालय प्रमुख र महाशाखा प्रमुखसँग सम्झौता गर्नका लागि निर्देशन दिनुभएको छ । त्यस्तै सबै सचिवहरूलाई साउन १५ भित्रै कार्य योजना बनाउन र एक करोडभन्दा माथिको योजना कार्यान्वयनमा लैजान निर्देशन दिनुभएको छ । कोशी प्रदेशमा हाल ६० वटा कानुन निर्माण भइसकेको, २४ वटा नियमावली तयार भएको छ ।
आगामी वर्ष खरिद क्षेत्रमा देखिएको समस्या निराकरण गर्न र अत्यावश्यक कानुनहरू साउनभित्रै प्रदेशसभामा लगेर काम थाल्ने मुख्यमन्त्री तथा मन्त्रिपरिषद्ले तयारी गरेको छ । सबै मन्त्रालयलाई चाहिने कानुनहरू ड्राफ्ट गर्नका लागि पनि तयारी गरिएको छ । कर्मचारीहरूको समस्या हल गर्नका लागि लोकसेवा आयोगमा अध्यक्ष नियुक्तिदेखि कर्मचारीहरूसँगको छलफलमा कामसमेत अगाडी बढाइएको छ ।
मुख्यमन्त्री कार्कीले यस वर्ष विगतको भन्दा द्रुत गतिमा काम गर्ने र बेलैमा काम सक्ने गरी कार्य योजना अगाडी बढाइएको बताउनुभयो । उहाँले मन्त्रालयका निर्देशनमा जेठ १५ उता गोष्ठी, छलफल, अन्तरक्रियाका कार्यक्रम नगर्ने गरी योजना बनाउन सचिवहरूलाई कडाइका साथ निर्देशन दिनुभएको छ ।
