विराटनगर २५ असार। प्रहरीले विराटनगरबाट प्रतिबन्धित भारतीय नाेट सहित २ जनालाई पक्राउ गरेको छ ।
विराटनगरको अलगअलग स्थानबाट उनीहरूलाई पक्राउ गरिएको हाे । पक्राउ परेकाको साथबाट भारतीय तीन लाख १७ हजार रूपैयाँ बरामद भएको छ । विराटनगर–७ का २४ वर्षीय रोनक अग्रवाल साँझ ६ बजेतिर पक्राउ परेका छन् ।
भारतको जोगवनीबाट विराटनगर महानगरपालिका–१७ मटेरुवा हुँदै नेपाल प्रवेश गरेका अग्रवालाई सशस्त्र प्रहरी बल नेपाल प्रस्तावित सीमा सुरक्षा गुल्म रानीबाट खटिएको टोलीले पक्राउ गरेको हो ।
सशस्त्र प्रहरी बल मोरङका निमित्त प्रमुख, डीएसपी लोकनाथ उप्रेतीका अनुसार शंकास्पद हिसाबले प्रदेश १–०२–०५१ प १९३९ नम्बरको मोटरसाइकलमा नेपालतर्फ आउँदै गरेका उनलाई नियन्त्रणमा लिएर चेकजाँच गर्दा साथबाट प्रतिबन्धित भारतीय नोट बरामद भएको थियो ।
अग्रवालको साथबाट ५ सय दरका ४ सयवटा भारतीय नोट बरामद भएको उप्रेतीले बताए ।
