विराटनगर १ जेठ । मोरङ बुढीगंगाको टंकीसिनवारी जेसीजले ६ दिने उद्यमशिलता विकास संवन्धि तालिमको आयोजना गर्ने भएको छ । बुढीगंगा गाउँपालिकासँगको सहकार्यमा जेसीजले आगामी जेठ ९ गते देखि १४ सम्म तालिम आयोजना गर्न लागेको आज विराटनगरमा पत्रकार सम्मेलन गरि जानकारी दिईएको छ ।
बुढीगंगाका ७ वटा वडाहरुबाट १०–१० जनाको दरले ७० जना तालिमका सहभागी छनौट गरिने टंकीसिनवारी जेसीजका अध्यक्ष नवराज साहले जानकारी दिनुभयो । उहाँका अनुसार ख्यातीप्राप्त व्यक्तिहरुबाट तालिमका सहभागीलाई सहजीकरण हुने छ ।
तालिममा उत्कृष्ट भएका र नयाँ उद्यम शुरु गर्न चाहने यूवाहरुका लागि गाउँपालिकाले विउ पुँजी उपलब्ध गराउने योजना बनाईएको बुढीगंगा गाउँपालिकाका अध्यक्ष जितनारायण थापामगरले जानकारी दिनुभयो । उहाँले आगामी आर्थिक वर्षको बजेटमा यूवाको उद्यमशिलता विकासका लागि आवस्यक बजेटको व्यवस्था गरिने बताउनुभयो ।
