विराटनगर, २७ चैत । विराटनगरस्थित जेनिथ इन्टरनेशनल कलेजले उद्योगपति राजेन्द्र राउतसहित दुईजनालाई सम्मान गरेको छ ।
चौथो वार्षिकोत्सवका अवसरमा कलेजले नेपाल उद्योग वाणिज्य महासंघ प्रदेश–१ का उपाध्यक्ष तथा केन्द्रीय सदस्यसमेत रहनु भएका राउतसहित समाजसेवी मीना जोशीलाई गरेको हो । उद्योगपति राउत र समाजसेवी जोशीलाई कलेजका तर्फबाट पूर्वाञ्चल विश्वविद्यालयका उपकुलपति प्रा.डा. यादवराज कोइरालाले दोसल्ला ओढाएर सम्मानपत्र प्रदान गर्नु भएको थियो । त्यस्तै सोही अवसरमा कलेजको नवनिर्मित भवनको कार्यक्रमका प्रमुख अतिथिसमेत रहनु भएका कोइरालाले शिलान्यास गर्नु भएको थियो । आफ्नै जग्गामा सुविधा सम्पन्न भवन निर्माण गर्न लागिएको क्याम्पसका कार्यकारी अध्यक्ष प्रा.डा. दुर्गानन्द चौधरीले जानकारी दिनुभयो ।
सो अवसरमा वीवीए र एमवीए अध्ययन पूरा गरेर जाने विद्यार्थीको विदाई र नवआगन्तुक विद्यार्थीको स्वागतसमेत गरिएको थियो । त्यस्तै २०७८ सालमा भएका विभिन्न खेलकुद प्रतियोगिताका विजयी विद्यार्थीलाई पुरस्कारसमेत प्रदान गरिएको क्याम्पस प्रमुख सन्दिपदास श्रेष्ठले बताउनुभयो । कलेजमा ४ सय विद्यार्थी अध्ययनरत छन् ।
